Än Salomon Fos 15:3-24

³Ewe Samol mi Lapalap a küna mine a fis ekis meinisin, a ouwasacha ekewe chon föföringau me chon pwüng.

⁴Kapas pwetete ra atoto manau, nge kapas pöchökül ra atai letipen aramas.

⁵Eman mi tiparoch a pöütala än saman kapasen öüröür, nge ätewe mi etiwa kapasen fön a mirit.

⁶Lon imwen ekewe chon pwüng mi wor chomong wöü, nge liwinin än ekewe aramasangau angang a aworato osukosuk.

⁷Ekewe chon tipachem ra achöfetalei silelap, nge ekewe chon tiparoch resap föri iei usun.

⁸Ewe Samol mi Lapalap a oput än ekewe aramasangau asor, nge a pwapwa ren än ekewe chon wenechar iotek.

⁹Ewe Samol mi Lapalap a oput än ekewe aramasangau föför, nge a echeni chokewe mi föri mine a pwüng.

¹⁰Mi wor eu apwüng mi chou fän iten ätewe mi föri mine a ngau, nge ätewe mi oput kapasen fön epwe mäla.

¹¹Ewe lenien sotup me ewe leni mi alolol ra pwä me mwen ewe Samol mi Lapalap. Ifa usun, än eman aramas epwe tongeni aopala ekiekin letipan me fän mesen Kot?

¹²Eman chon turunufas esap aücheani än eman epwe apwüngü, esap mochen angei öüröüran seni ekewe chon tipachem.

¹³Eman mi pwapwa lon lelukan a pwal wopwapwa won mesan, nge eman mi letipeta a wololilen.

¹⁴Eman mi mirit a kütta silelap, nge eman mi tiparoch a menemenöch ren an wewemang.

¹⁵Ränin manauen eman mi nom lon riaföü a chök ingau, nge eman mi pwapwa lon lelukan a chök pwapwa fochofoch.

¹⁶A mürina än eman epwe wöükükün, nge a niuokusiti ewe Samol mi Lapalap, lap seni än eman epwe wöümong, nge a nom lon weires.

¹⁷A mürina ach mongöfengen iasai, nge mi wor tong lefilach, lap seni ach ochochfengen fituken kow mi kiris, nge mi wor koput lefilach.

¹⁸Eman aramas mi songokai a afisätä anini, nge eman mi mosonotam a afisätä kinamwe.

¹⁹Eman mi chipwang a tolong lon chomong weires, nge eman mi wenechar esap tolong lon osukosuk.

²⁰Eman alüal mi mirit a apwapwai saman, nge eman mi tiparoch a chök oput inan.

²¹Eman esap wor an mirit a pwapwaiti umwes, nge eman mi mirit a föri mine a pwüng.

²²Are esap wor kapasen öüröür, esap fis mine aramas ra ekiekietä. Nge are a wor chomong chon öüröür, a fisiöch mine ra ekiekietä.

²³Eman aramas a pwapwa, lupwen a sileöchü mine epwe apasa, sokun kapas mi fichiti eu me eu fansoun.

²⁴Chon tipachem ra fetal won ewe al mi aletä ngeni manau, pwe resap fetal won ewe al mi aletiu ngeni mäla.