Än Salomon Fos 15:18-32

¹⁸Eman aramas mi songokai a afisätä anini, nge eman mi mosonotam a afisätä kinamwe.

¹⁹Eman mi chipwang a tolong lon chomong weires, nge eman mi wenechar esap tolong lon osukosuk.

²⁰Eman alüal mi mirit a apwapwai saman, nge eman mi tiparoch a chök oput inan.

²¹Eman esap wor an mirit a pwapwaiti umwes, nge eman mi mirit a föri mine a pwüng.

²²Are esap wor kapasen öüröür, esap fis mine aramas ra ekiekietä. Nge are a wor chomong chon öüröür, a fisiöch mine ra ekiekietä.

²³Eman aramas a pwapwa, lupwen a sileöchü mine epwe apasa, sokun kapas mi fichiti eu me eu fansoun.

²⁴Chon tipachem ra fetal won ewe al mi aletä ngeni manau, pwe resap fetal won ewe al mi aletiu ngeni mäla.

²⁵Ewe Samol mi Lapalap a ataetiu imwen chon lamalamtekia, nge a tümwünü kiännin fanüen eman fefin mi mä pwülüan.

²⁶Ewe Samol mi Lapalap a oput än ekewe aramasangau ekiek, nge a pwapwaiti än chokewe mi limöch leluker kapas.

²⁷Eman mi tipemong ngeni an epwe angei winnan fän pwüngingau a aworato osukosuk won chon leimwan, nge eman mi oput lifangen amichimich epwe manau.

²⁸Ekewe chon pwüng ra akomwen ekieköchü mine repwe pälüeni ngeni kapas, nge ekewe aramasangau ra müttir atowu kapas mi afisätä osukosuk.

²⁹Ewe Samol mi Lapalap a rongorong ngeni än ekewe chon pwüng iotek, nge esap afäli ekewe aramasangau.

³⁰Wopwapwan won mesen eman a apwapwai leluken aramas, nge pworaus mi mürina a akinamwei inisin aramas.

³¹Eman mi aüselingafichi ekewe kapasen fön mi atoto manau epwe nonom lein ekewe chon tipachem.

³²Eman mi asorongorongola ngeni kapasen emirit a püsin oput i, nge eman mi afäli kapasen fön a fefeitä lon an weweöch.