Än Salomon Fos 11:20-30

²⁰Ewe Samol mi Lapalap a oput aramas mi rikirik leluker, nge a pwapwa ren chokewe mi föri mine a pwüng.

²¹A fokun let pwe eman aramasangau epwe wesewesen angei liwinin an föföringau, nge chokewe mi föri mine a pwüng repwe küna ngas.

²²Eman fefin mi liöch, nge esap mirit, a usun chök efoch ring seni kolt lon pwötün eman piik.

²³Än ekewe chon pwüng mochen a sopolong lon mine a mürina, nge mine ekewe aramasangau ra apilükülüküni a sopolong lon kapwüng.

²⁴Mi wor aramas ra fangafangöch, nge ra chök pisekisekila. Mi pwal wor aramas ra fangangau, nge ra chök wöüngauala.

²⁵Eman aramas mi kichiöch epwe pisekisekila, nge eman mi alisi aramas, aramas repwe pwal alisi.

²⁶Aramas ra otteki ätewe mi amwöchü seniir wiich pokiten an mochen awattela liwinin, nge ra afeiöchü ätewe mi amömöla ngeniir wiich.

²⁷Eman mi achocho le föri mine a mürina a kütta chenin me ren Kot, nge ätewe mi kütta mine a ngau epwe küna mine a ngau.

²⁸Aramas mi apilükülükü püsin wöür repwe turula usun chök chön irä ra turutiu mürin leres, nge ekewe chon pwüng repwe manauöch usun chök chön irä mi arauarau.

²⁹Eman mi tümwününgau ngeni chon leimwan esap wor mine epwe angei lesopolan, nge eman mi tiparoch epwe chon angang ngeni eman mi mirit.

³⁰Pwüng a aworato manau, nge pwüngingau a angeala manau.