Än Salomon Fos 10:10-31

¹⁰Eman mi ächiki mesan a afisätä osukosuk, nge eman mi pwora le apwüngü mine a ngau a afisätä kinamwe.

¹¹Än eman chon pwüng kapas eu puächen kolukun manau, nge än eman aramasangau kapas a pwärätä an mwänewüs.

¹²Oput a afisätä anini, nge tong a pwölüela ekewe pupungau meinisin.

¹³Eman mi silelap a apasawu kapasen tipachem, nge eman mi tiparoch epwe küna apwüng fän wichiwich.

¹⁴Ekewe mwän mi tipachem ra akangei chök silelap, nge än eman chon tiparoch kapas a akanato feiengau.

¹⁵Än ekewe chon pisekisek wöümong iei ar leni mi pöchökül, nge än ekewe chon mwelele wöüngau iei ar feiengau.

¹⁶Liwinin än ekewe chon pwüng angang epwe atoto ngeniir manau, nge winnen ekewe aramasangau a atoto ngeniir apwüng.

¹⁷Eman mi aleasochisi ekewe kapasen fön epwe manau, nge eman mi pöütala ekewe kapasen emirit epwe tolong lon feiengau.

¹⁸Eman mi aopala an oput i eman chon chofana, nge eman mi luapas i eman chon tiparoch.

¹⁹Anaie a wor chomong kapas ie, a pwal tongeni fis tipis, nge eman mi fanafanala a mirit.

²⁰Än eman chon pwüng kapas a usun silifer mi mürina, nge än eman aramasangau ekiek esap wor aüchean.

²¹Än eman chon pwüng kapas a afeiöchü chomong, nge eman chon tiparoch a mäla, pun esap wor an mirit.

²²Feiöch seni ewe Samol mi Lapalap a awöüükich, nge i esap apacha och riaföü ngeni.

²³Eman chon tiparoch a pwapwa are a föri mine a mwäl, nge eman mwän mi weweöch a pwapwa ren an tipachem.

²⁴Mine eman aramasangau a niueiti epwe fis ngeni, nge mine eman chon pwüng a aläläei epwe tori.

²⁵Wesin än ewe mölümöl enito, ekewe aramasangau resap chüen nom, nge ekewe chon pwüng ra nüküchar tori feilfeilachök.

²⁶Usun finikar a amwona ngich, nge ötüöt a aweiresi mesach, iei usun eman chon chipwang a aweiresi ätewe mi akünöü.

²⁷Ach niokusiti ewe Samol mi Lapalap a alangatama manauach, nge ierin manauen ekewe aramasangau epwe mochomoch.

²⁸Än eman chon pwüng apilükülüköch a sopolong lon pwapwa, nge mine eman aramasangau a witiwiti esap fis.

²⁹Ewe Samol mi lapalap a tümwünüöchü chokewe mi wenechar, nge a afeiengaua ekewe chon föföringau.

³⁰Eman chon pwüng esap fokun mwöküt seni lenian, nge eman aramasangau esap nonometiu lon ewe fanü.

³¹Kapasen tipachem ra towu seni awen eman chon pwüng, nge chönawen eman chon atuputup epwe üttüwu.