Än Salomon Afalafal 7:11-22

¹¹Mirit a mürina usun wöüch me ren samach, a pwal eu feiöch fän iten chokewe mi nom won fanüfan.

¹²Iwe, mirit a alisi aramas usun chök moni a pwal alisi aramas. Nge iei feiöchün silelap pwe eman mi mirit a tümwünü püsin manauan.

¹³Iwe, kopwe ekieki usun mine Kot a föri. Iö a tongeni awena mine Kot a apwora?

¹⁴Lon fansoun om feiöch kopwe pwapwa, nge lon fansoun om osupwang kopwe ekieki: Kot a tinato feiöch me osupwang. Iei mine eman aramas esap tongeni silei mine epwe fis lon fansoun mwan.

¹⁵Lon ränin manauei mi pön üa küna ekei ruu sokun lapalap: Eman aramas mi pwüng a chök mäfeiengau, nge a föri mine a pwüng. Nge eman aramas mi pwüngingau a manauatam, nge a föri mine a pwüngingau.

¹⁶Üa mefi pwe ese nien lomot om kopwe achomonga om föförün pwüng ika alapala om tipachem. Pwota ka mochen püsin afeiengauok?

¹⁷Üa pwal mefi pwe esap öchituk om kopwe achomonga om föföringau ika alapala om föförün umwes. Pwota kopwe mäla, nge esamwo tori om fansoun?

¹⁸Iwe, a mürina pwe kopwe amwöchü ewe eu, nge kosap pöütala pwal ewe eu. Pun eman mi niueiti Kot esap achomonga an föför mi pwüng ika an föför mi ngau.

¹⁹Tipachem ellet a fokun tümwünü eman mi mirit lap seni engol samol ra tümwünü eu telinimw.

²⁰Ellet, esap fokun wor eman chon pwüng won fanüfan a chök föri mine a pwüng fansoun meinisin, nge esap wor an tipis.

²¹Kosap rongorong ngeni meinisin mine aramas ra apasa, pun a tongeni fis pwe kopwe rong än noum chon angang alalangauok.

²²Pun ka püsin silei pwe ka fen pwal alälängaua aramas fän chomong.