Än Salomon Afalafal 5:11-20

¹¹Lupwen wöün eman a chomongola, repwe pwal chomongola chokewe mi manau seni. Iei chök feiöchün ewe mi wöü pwe a chök küna wöün we ren mesan.

¹²Eman mi angang weires a möür kinamwe, ika a wor ekis chök anan ika chomong. Nge eman mi fokun wöümong esap tongeni möür kinamwe ren an öüreki wöün.

¹³Iwe, üa küna och mi ngau won fanüfan: A wor aramas ra achufengeni wöür, nge ra püsin feiengau ren.

¹⁴Pun lupwen wöür kewe ra lus ren och angang mi afeiengau, esap chüen wor och mine repwe tongeni ngeni nöür kewe.

¹⁵Iwe, usun eman a uputiu won fanüfan fän an selela, ina usun epwe pwal feila. Esap wor och seni mine a tori ren an angang weires epwe tongeni uweela lepöün.

¹⁶Iwe, pwal ei och mi ngau: Eman aramas epwe feila usun chök an feito. Met feiöchün, are an angang weires a solap usun chök turufi asepwäl?

¹⁷Lon ränin manauan meinisin a chök nom lon rochopwak me lolilen, pwal lon chomong sokun riaföü me samau me chou.

¹⁸Mürin, üa küna pwe a mürina me fich ngeni eman pwe epwe mongö o ün, epwe pwal pwapwa lon an angang weires won fanüfan lupwen ränin manauan mi mochomoch Kot a ngeni, pun iei wisan.

¹⁹Are Kot a ngeni eman wöü me pisekisek o atufichi pwe epwe manau seniir, are a angei wisan o pwapwa lon an angang weires, iei eu lifang me ren Kot.

²⁰Iwe, ena sokun aramas esap öüreki pwe a mochomoch ränin manauan, pun Kot a aura lelukan ren pwapwa.