Än Salomon Afalafal 4:5-15

⁵Eman aramas esap mirit a afiti pöün o püsin afeiengaua.

⁶A öch än eman epwe kisikis pisekin, nge a kinamwe, lap seni än eman epwe watte pisekin ren an angang weires fän ruofoch pöün, nge a turufi asepwäl chök.

⁷Iwe, üa pwal küna och mi pön won fanüfan:

⁸Eman aramas mi alemanüla, esap wor nöün ika pwiin, nge esap müchüla an angang weires. Iwe, esap menemenöch ren wöün. Esap ais, “Fän iten iö üa angang weires o epeti pwapwa seni manauei?” Pwal ei pön chök o angang solap.

⁹Ruoman ra feiöch seni eman chök, pun ar angangfengen a fisiöch.

¹⁰Pun lupwen eman a turula, chienan epwe apwätäi. Nge feiengauen eman mi alemanüla, pun esap wor eman epwe apwätäi, lupwen a turula.

¹¹Lupwen ruoman ra möürfengen, ra pwichikar. Nge met eman mi alemanüla epwe pwichikar ren?

¹²Lupwen eman a fiu ngeni eman mi alemanüla, ewe eman mi alemanüla a tongeni kuf, nge ruoman repwe wesewesen akufu ewe mi fiu ngeniir. Iwe, ülüfoch lül mi olafengen resap müttir mwü.

¹³Eman alüal mi wöüngau, nge a mirit, a mürina seni eman king mi chinlap, nge a umwes, esap chüen mochen rongorong kapasen fön.

¹⁴A tongeni fis, pwe ewe alüal a towu seni imwen fötek pwe epwe king, ika a uputiu lon wöüngau lon ewe mwü a nemeni me mürin.

¹⁵Üa küna ekewe aramas meinisin mi manau won fanüfan pwe ra päi ngeni ewe alüal mi siwili ewe king.