Än Salomon Afalafal 3:2-16

²A wor fansoun uputiu pwal fansoun mäla, a wor fansoun fotukätiu pwal fansoun wietä.

³A wor fansoun niela pwal fansoun apöchökülätä, a wor fansoun ataela pwal fansoun aüetä.

⁴A wor fansoun kechü pwal fansoun takir, a wor fansoun lolilen pwal fansoun pwörük.

⁵A wor fansoun atoropasafeili fau pwal fansoun ionifengeniir, a wor fansoun oneimw pwal fansoun onout.

⁶A wor fansoun kütta mettoch pwal fansoun pöütüla, a wor fansoun amwöchü pwal fansoun äsechala.

⁷A wor fansoun kamwei mettoch pwal fansoun teifengeniir, a wor fansoun fanafanala pwal fansoun kakapas.

⁸A wor fansoun tong pwal fansoun oput, a wor fansoun maun pwal fansoun kinamwe.

⁹Met sokun feiöch eman epwe angei seni an angang weires?

¹⁰Iwe, üa küna ewe angang weires Kot a awisa ngeni aramas.

¹¹Meinisin mine Kot a föri a unusen mürina lon ar fansoun. Iwe, a pwal atolonga ekiekin fansoun esemwüch lon letipen aramas, nge resap tongeni weweiti mine Kot a föri seni lepopun tori lesopolan.

¹²Iwe, üa silei pwe esap wor och a mürina lap seni än eman epwe pwapwa o föri mine a mürina lon fansoun manauan.

¹³Nge üa pwal silei pwe aramas meinisin repwe mongö o ün, repwe pwal pwapwa lon ar angang weires. Pwal iei eu lifang me ren Kot.

¹⁴Iwe, üa silei pwe meinisin mine Kot a föri epwe nonom tori feilfeilachök. Esap wor eman a tongeni apacha och ngeniir, esap pwal wor eman a tongeni aimwü och seniir. Iwe, Kot a föri iei usun pwe aramas repwe meniniti.

¹⁵Mine a wor ikenai a fen wor me lom, nge mine epwe wor me mürin a fen pwal wor me lom. Iwe, mine Kot a föri me lom, a pwal förisefäli.

¹⁶Iwe, üa pwal küna pwe won fanüfan a wor pwüngingau lon lenien apwüng, a pwal wor pwüngingau lon lenien pwüngüöch.