Än Salomon Afalafal 10:2-18

²Eman mi mirit a chök föri mine a pwüng, nge eman mi umwes a chök föri mine a ngau.

³Lupwen eman mi umwes a fetal won al, iei mwo nge a chök pwä pwe esap wor an mirit. Iwe, a pwärätä ngeni aramas meinisin pwe i eman mi umwes.

⁴Are om samol a song ngonuk, kosap püsin towu seni wisom. Pun eman mi mosonoson a tongeni aükätiu och mwäl mi watte.

⁵Iwe, üa pwal küna och lapalap mi ngau won fanüfan, a pop seni mwälin eman samol:

⁶Chon umwes ra nom lon wis tekia, nge chon pisekisek ra nom lon lenien chon tekison.

⁷Üa küna pwe ekewe amanau ra wawa oris, nge samol ra fetal usun chök ekewe amanau.

⁸Iö a tuw eu pwang epwe püsin turulong lon, nge iö a ataela eu tittin fau, eman serepenit epwe küw.

⁹Iö a amökü fau epwe tongeni kinas ren, nge iö a äsätta mwüch epwe tongeni feiengau ren.

¹⁰Are efoch kouk a kop, nge sisap seimi, sipwe fokun weires ren lupwen ach nöünöü. Nge mirit a alipwäköchü eman.

¹¹A ser ach sipwe niela eman chöükö mürin an kükich.

¹²Iwe, eman mi mirit a iteüöch ren an kapas, nge eman mi umwes a feiengau ren an kapas.

¹³Lepoputän an kapas esap wor wewen, nge sopolan a unusen umwes.

¹⁴Eman mi umwes a kapas chomong. Esap fokun wor eman a tongeni silei usun mine epwe fis. Iö a tongeni pwärätä ngeni aramas mine epwe fis mürin ar mäla?

¹⁵Iwe, eman mi umwes a püsin apekusu ren an angang weires, pun esap fokun silei ewe al a ale ngeni ewe telinimw.

¹⁶Eu fanü a feiengau, are eman semirit a king lon, are pwal nöüwisen lon ra fen kametip lesosor.

¹⁷Nge eu fanü a feiöch, are eman nöün aramas tekia a king lon, are pwal nöüwisen lon ra mongöfengen lon fansoun fich pwe repwe pöchökül ren, nge resap ünüpuch.

¹⁸Are eman a tümwününgauei osun imwan, epwe lich, nge are eman a chipwang, imwan epwe tala.