Átus 5:2-11

²Ayteke ig awna gut gihayo: ―Uyay darih abusku uwasra akakurapig udahanwa. Henneme wis ka akkin gitkis kiyapwiye Jesus giwatnipwi. Wis ikí gitkis ke wotbe madiktehbe ukakurabe wis ikí. ―Uyay. Ig darihpin. Ayteke ig iké abusku akakurapig asemne ta giwakuitkis Jesus giwatnipwi.

³Igme kiyapwiye Pedru hiyapni henne, ig awna ta git: ―Kiyapwiye Ananíyas, mmahki pis isakse Satanás kawihpi? Mmahki pis arehwa gikak Uhokri Gitip gitew? Pis darihe abusku piwasra akakurapig pidahan henneme pis ikawpari ke wotbe pis ikí madikte gidahankis Jesus gihiyegapu. Pis wasayme. Pis ka ikí madiktema no karukri.

⁴Mmahki henne? Apit pis piyuke in piwasra ini pidahan. Piwnteknewa pis piyukwin. Akakurapig, piswa hiyak ku samah pis keh nikak. Nikwe pariye ku apim inin danuh apit piyakni? Pis pipewkan pis wasayme arit hiyegnenwa amadgaya inin bawa amun ini nikwe pis wasayme ta git Uhokri hawwata.

⁵Ig amekene Ananíyas timapni henne, ig tuguhe miyapte. Madikte hiyeg ku pariye ayge timepbetnenes igkis hiyapni henne, igkis apisasew kaayhsima.

⁶Ayteke nikwe nerras takwapye ayge igkis kannikewbet. Igkis awasmines gipit akak kamis. Igkis iwepri. Igkis apuhpig.

⁷Mpana ler mapiya, no eg gihayo danuh atere. Eg ka hiyak ku samah gimiremni gugihgi.

⁸Igme kiyapwiye Pedru ayapru: ―Mmah yis piyuke yiwasra mmah adahan nonewa karukri pigihgi ayta ewk atan? Egme kaytwa giwn: ―Ihi, adahan nonewa karukri.

⁹Igme kiyapwiye Pedru timapni henne, ig awna ta gut: ―Pariye ku apim inin danuh? Mmah pis pihiyakemni hehpekwiye gikak pigihgi? Mmah yis yipewkan hikek Uhokri Gitip baki igyerwatma ay? Timá nerras takwapye kahiriman gikugkukis anumeku lappot ku samah gidiyhemnikis. Igkis apuhe pigihgi kuwis. Kuri pis hawwata apuhpiwata.

¹⁰Eg timapni henne, aynewa eg tuguhe gikimpuit miyopte. Ayteke nerras takwapye pareke atere. Igkis utepru ayipa gumiromni kuwis. Igkis hiyapni henne, igkis iwepru. Igkis tipik apuhpig pahamtak gikak gugihri.

¹¹Madikte Uhokri gihiyegapu igkis timé gakkis henne, igkis apisasew kaayhsima nikwe. Hawwata madikte nawenépwi ku pariye timé gakkis igkis apisasewwata.