Átus 12:7-23

⁷Pahaye adahan pahapwi ahj Uhokri giwatni hiyapkiswe ta git. Ayge in parakseket kabutni. Ig ahj dax gimuwgik kiyapwiye Pedru. Ig wadistepri. Ayteke ig awna git: ―Asá kannikaw kibentenwa. Aynewa ini xen watekwe giwakutak.

⁸Ayteke ig ahj awna akiw: ―Kawihnaba pikabutik pikasotni. Igme kiyapwiye Pedru kawihminaw. Igme ahj awna: ―Kawihnaba pidagmanpit. Ba ayta wew nuhapuh butte.

⁹Ig kiyapwiye Pedru timapni henne, ig pes ig makeke gihapu butte. Henneme ig gipewkankam garisun. Ig ka hiyak ba igyerwatma ahj danuh ta git.

¹⁰Igkis wew, igkis mpiye ner pitatye apuriwkeputne. Igkis wew atakisa akiw, igkis mpiye ner apeyni apuriwkeputne. Ayteke igkis danuh ta anumekut ini parakseket alappotad sipari pahambatak paytwempu. Ariwnteknewa ini lappot wokhaw. Ayteke nikwe igkis pese. Igkis wew aynessawa akiw apigku ahin. Aynewa ig ahj tipik giw kiyapwiye Pedru.

¹¹Igme kiyapwiye Pedru hawkamnihwa. Ig awna: ―Kuri nah hiyakni ku igyerwa ahj Uhokri awahkise numinhu. Ig wiwhpen giwakutak kiyapwiye Erodis. Ig wiwhpen ariw madikte mbeyne ku pariye nerras uwewkistenwiy gikehnikis nukakhu.

¹²Kit nah bisik kuri? Nah atakte ta gupinwat kiyapuno Mahi. Ayteke nikwe ig tipikwiye ta gupinwat kiyapuno Mahi. Eg kiyapuno Mahi egnewa kiyapwiye João Markus ginag. Ayge gupinwa kaayhsima hiyeg pahadgupu piriyepkewne.

¹³Ig kiyapwiye Pedru danuh atere, ig tetes lappot. Pahapu himano kewyo Rodi eg timapni henne, eg ayta iwasa ku pariye hiyeg danuh.

¹⁴Ayge eg murotpi git kiyapwiye Pedru gikupimna. Eg hiyapni henne, eg ba gubetki keh eg miyehe woka lappot. Eg sigis diyuh agikut xam. Eg danuh atere, eg awna ta gitkis nerras hiyeg ayge. Guwn: ―Kiyapwiye Pedru ay anumeku lappot.

¹⁵Igkisme hiyeg kaytwa guwn: ―Pis kuwis puwpup. Egme awninano: ―Igyerwa kiyapwiye Pedru ay. Igkisme kaytwa guwn: ―Nikwe kiyapwiye Pedru ganmap.

¹⁶Igme kiyapwiye Pedru ayge tetesnene lappot. Igkis timapni henne, igkis atere woka lappot. Ayge nikwe igkis hiyá kiyapwiye Pedru. Igkis wakaymnibdi kaayhsima.

¹⁷Igme awokasaw gitkis adahan igkis tinwohaw. Ayteke ig akkamnih ta gitkis ku samah Uhokri wiwhkiswig agikutak parakseket. Pisenwa ig awna gitkis: ―Ataknabay ta git kiyapwiye Tiyagu gikakkis ukebyupwiy. Akkanabay gitkis ku pariye danuh nuthu. Nah me tipik. Ayteke nikwe ig tipik tahhan aparayewa iwetrit.

¹⁸Hewke kaayhsima kadukmanka ayge gibetkis nerras suwtat. Igkis ka hiyak ku samah kiyapwiye Pedru gipeswen.

¹⁹Apim ini ig amekene Erodis awahkis hiyeg atere gipegepten kiyapwiye Pedru henneme igkis ka utepri. Ig hiyapni henne, ig ayá gisuwtatapu ku samah gipeswen kiyapwiye Pedru. Igkisme ka hiyak. Ayteke nikwe ig umahkiswigkis. Ayteke ariwnteke ini ig pes ayteke apititak Judeyamnaw. Ig tipik ta apitit paytwempu Sesaréya. Ayge ig msekwe.

²⁰Ig amekene Erodis ayge Sesaréya, hiyeg ku pariye tiroyenepwi gikakkis hiyeg ku pariye sidonyenepwi igkis danuh atere git. Igkis ayta kibeyhepye gihawkankis gikak amekene Erodis mmanawa ig kaayhsima dagawne gitkis. Pitatye igkis darihwak gikak kiyapwiye Bilastu ku pariye apuriwkeputne amekene Erodis gipin. Igkis darihwak gikak adahan igme gawnamnihitenkis. Ayteke nikwe igkis madikte atak ta git amekene Erodis adahan kibeyhene gihawkankis gikak kahadbe igkis ik adahan isimpiye gimanakis ta gitkis gihiyegapu.

²¹Igme amekene Erodis hiyapni henne, ig kaniy pahay hawkri adahan ig kinetihwene ta gitkis nerras hiyeg. Ahawkanaprik danuh, ig kawih gisimsa gibereswen. Ig bat amadga gepwi adahan ku kiney ig hiyekne gikakkis hiyeg. Ayge nikwe ig kinetihwene gitkis.

²²Pisenwa gawnhan nerras hiyeg kabiman. Giwnkis: ―Ka hiyegma amadgaya inin awnene wothu. Ig kiyapwiye Erodis ig awna kewa Uhokribe.

²³Pahaye adahan pahapwi ahj Uhokri giwatni keh ig amekene Erodis hiyá karayt mbeyepye awaku ig ikawpari ke wotbe igwatbe Uhokribe, ig ka kiyatha Uhokri. Ayteke nikwe gikawankati axwig. Ig miyap.