Átosi 10:5-30

⁵Ininiãkara ãtikaka kikiakori piokanata Xopimoni Simão Petro uaimoni imininina ĩkapani.

⁶Iua kaikota ãti Simãokata, aamata kamakarikata. Iua aapoko potxoari uiniti takote aua. Iua Simão Petro sãpiretaiko pikamakiti tĩkane —itxa Teoso nitiri.

⁷Eereka iua Teoso nitiri sipe. Iposo atoko Konério akiritana ipi initiriakori, ãtika isotatone pakini. Iua sotato kamari Teoso sãkire iaõka. Iua auapika Konériokata, inireẽkiti ikamini tĩkane.

⁸Ininiã Konério sãpiretana ninoa ikinipoko Teoso nitiri sãpiretakiti. Iposo atoko iokanatana Xopimoni.

⁹Katimatinĩkata Konério iokanatakini potorika. Apaniãxiti inakasaaki ninoa apokaãpota sitatxi Petro auiniãtaã. Iuasaaki Petro kanikauata aapokotxi nopini Teoso imisãkiretini ĩkapani.

¹⁰Iuasaaki Petro natxita. Inirekari inipokotini. Nipokori kamikosaaki, itaponeuata.

¹¹Itaponeẽ atamatari iaxiti xorekini. Aamata mitamatari katxakaãpota iuamoni. Imapotomatare ipi ipi pakini iaxirikaãka. Iua aamata katxaka xitimoni.

¹²Iua aamata ãki aua ikini sereti kaxipirini. Aua pirãtxi. Aua ĩtopa auakani. Aua imini. Aua araãkani.

¹³Ininiã Petro kenakotari itanokiri sãkirauatini: —Petro, põkitikaua. Pokari ia, pinikini ĩkapani —itxari Petro.

¹⁴Petro Xoteo itxaua, ininiã kona ikinika !inika. Ininiã Petro txari: —Konapitini Apiananiri. Kona ninikari ikinipoko naia kaxipirini. Manaiatini. Pamininiri —itxa.

¹⁵Iuaĩkana itanokiri sãkirauata: —Nota oeretakiti kona kamininiri kona pitxape —itxa.

¹⁶Ipi, ãti pakinikata iua aamata katxaka ikara atoko. Iposo atoko ikanĩkaxitita Teoso tixinemoni.

¹⁷Ininiã Petro ãkixinireẽ ixinikaxitita: —Kanatokopa itxa ikara nitapone? Iuasaakipeka Konério iokanatakini apokapekari Simão aapoko. Apokana Simão aapoko toremoni.

¹⁸Akiritana: —Ereẽkai. Simão Petro uai aua atxiĩti? —itxana.

¹⁹Iuasaaki Petro xinikapanikari itapone. Erekari Matamatakoti txari: —Ikiraãkarana ipi, ãti pakini kãkiti nitanãtai.

²⁰Põkitikaua. Pikatxaka xitimoni. Pisa ninoakata, kotxi niokanatana ninoa uaimoni —itxa Erekari Matamatakoti.

²¹Ininiã Petro sari Konério iokanatakinimoni: —Notakara hĩte nitanãta. Kipa ĩkai hĩte?

²²Ninoa apakapapiretari iua: —Konério, aãuĩte iokanataua ate. Erekari iua. Ikamari Teoso sãkire iaõka. Ikinipoko Xoteo apokaerekatari iua. Teoso nitiri iaxitikiri paniãtari iua pite akiritini, pisãkire ikenakotini ĩkapani —itxana.

²³Ininiã Petro: —Hiĩroã. Uai himaka —itxa. Katimatinĩkata Petro sari ninoakata. Apanakini Xesosi sãkire auiãkani Xopikini sari apaka.

²⁴Katimatinĩkata apokana Sesaréia sitatxiti, Konério auiniãtaã. Iua Konério apotiitapekana inirimane, aõkimanere pakini Petro iãtapinina ĩkapani.

²⁵Petro ĩroãkasaaki Konério aapoko, iua aõkitari Konério. Iuasaaki Konério kapotoreẽkaua Petro apisatoõ.

²⁶Txamari Petro txari iua: —Põkitikaua. Kiki pite atoko inakarikarano nota.

²⁷Isãkirauatakasaakina, Petro ĩroã. Aõkitari ito kãkiti apotiitakaniua.

²⁸Ininiã itxana: —Hĩte imarotari ate kiomaneakorini !auiritari Xoteo moianatiniri ãti uãka. !Auiritaãka ate ĩroini hĩte atoko inakari aapoko. Iuaritika Teoso txano nota: “Na pakiritapiri ãti uãka kanaiari,” itxano.

²⁹Ininiã hĩte pĩkapiretakasaakino nota, nimarotari atão nisini hĩtemoni. Ininiã, kinirepa hĩte apakĩtakano nota? —Petro txari Konériomoni.

³⁰Konério apakapapiretari: —Ipi, ipi pakini õti apisapanika nauanãta naapoko. Iuasaaki kona ninikari nipokori, Teoso nimisãkiretini ĩkapani. Kikatapeka inakasaaki, nimisãkiretakasaakiri Teoso, katimaritika kiki tokiã nota apisatoõ. Pomẽkoriri imãka.